திருப்பத்தூர் மாவட்டத்தில் திருமணம் செய்து கொள்வதாகவும், சிங்கப்பூரில் வேலை வாங்கித் தருவதாகவும் ஆசை வார்த்தை கூறி பெண்களிடம் பல லட்சம் ரூபாய், நகைகள் மற்றும் சொத்துகளை மோசடி செய்ததாகக் கூறப்படும் நபரை போலீசார் கைது செய்துள்ளனர்.
திருப்பத்தூர் தில்லைநகர் பகுதியைச் சேர்ந்த கமலக்கண்ணன் (36) என்பவர், ஏற்கனவே ஒரு பெண்ணிடம் திருமண வாக்குறுதி அளித்து, அவரது பணம் மற்றும் நகைகளை பயன்படுத்தி கார் வாங்கியதாக கூறப்படுகிறது. பின்னர் அந்த காரை அடமானம் வைத்து தலைமறைவானதால், பாதிக்கப்பட்ட பெண் அளித்த புகாரின் பேரில் அவர் மீது மோசடி வழக்கு பதிவு செய்யப்பட்டு சிறையில் அடைக்கப்பட்டிருந்தார்.
சிறையில் இருந்து வெளியே வந்த பின்னர், தனது நண்பரின் மனைவியான சுந்தரி (பெயர் மாற்றப்பட்டுள்ளது) என்பவருடன் நெருக்கமாக பழகியுள்ளார். அவரது குடும்ப பிரச்சினையை பயன்படுத்தி, “நான் உன்னை திருமணம் செய்து கொள்கிறேன், கவலைப்பட வேண்டாம்” என்று நம்பிக்கை அளித்ததாக போலீசார் தெரிவித்தனர். பின்னர் சுந்தரியின் தாயாரின் நகைகள், சேமிப்பு பணம் மற்றும் வீட்டை விற்று கிடைத்த தொகையை சிங்கப்பூருக்கு அழைத்துச் செல்வதாக கூறி பெற்றுக் கொண்டதாக கூறப்படுகிறது.
பாஸ்போர்ட், விசா மற்றும் வெளிநாட்டு வேலைக்காக பல லட்சம் ரூபாய் தேவைப்படுவதாக கூறி, நகைகளை அடகு வைக்கச் செய்து பணம் வாங்கிய கமலக்கண்ணன், பின்னர் தலைமறைவானதாக விசாரணையில் தெரியவந்துள்ளது. அவ்வப்போது சிங்கப்பூரில் இருப்பது போல பொய்யான தகவல்களை கூறி பாதிக்கப்பட்ட பெண்ணை ஏமாற்றியதாகவும் கூறப்படுகிறது.
இறுதியில் தான் ஏமாற்றப்பட்டதை உணர்ந்த சுந்தரி, திருப்பத்தூர் மாவட்ட காவல் கண்காணிப்பாளர் அலுவலகத்தில் புகார் அளித்தார். அதன் அடிப்படையில் திருப்பத்தூர் தாலுகா போலீசார் மோசடி மற்றும் நம்பிக்கை துரோகம் உள்ளிட்ட பிரிவுகளின் கீழ் வழக்குப்பதிவு செய்து கமலக்கண்ணனை கைது செய்து நீதிமன்றத்தில் ஆஜர்படுத்தி சிறையில் அடைத்தனர்.
இந்த சம்பவம் திருமண வாக்குறுதி மற்றும் வெளிநாட்டு வேலை வாய்ப்பு என்ற பெயரில் நடைபெறும் மோசடிகள் குறித்து பொதுமக்கள் எச்சரிக்கையாக இருக்க வேண்டியதன் அவசியத்தை மீண்டும் உணர்த்தியுள்ளது.
Leave a Reply